اليومين دول في مناظرات شغالة في إنجلترا بين 3 من قادة الأحزاب مرشحين لرئاسة الوزراء..
..
وبعيداً عن الأسماء والتفاصيل، شوف إيه هي بقى القضايا اللي بيناقشوها؟ خد يا معلم..
..
هجرة الأجانب، العلاقة مع أوروبا، الضرائب، القيم البريطانية..
..
أيوه، أكيد حضرتك دلوقتي بتجز على سنانك وبتقول: إيه الناس دي؟!
..
عندهم ديموقراطية ومناظرات و3 أحزاب بتتنافس مش حزب واحد ورئيس واحد كاتم على نفسنا هنا في مصر..
..
بس أنا مش عاوزك (لا مؤاخذة) تحلم وتقول: يا ريت يبقى عندنا مناظرات زي الناس دول..!
..
ليه بقى؟
..
عشان إحنا في مرحلة ما قبل تحت أسفل منخفض مرحلة المناظرات دي أصلاً..!
..
مش مقتنع؟
..
طب شوف عينة من القضايا اللي واكلة عقولنا دلوقتي.. (اركن خناقة مرتضى وشوبير على جنب دلوقتي)
..
..
1- جمال مبارك ح يمسك ولا لأ؟ (على غرار قميص نفيسة نشف؟ لأ ما نشفش)
2- فضيحة مرسيدس. (مين الرجل الغامض بسلامته بتاع الفضيحة دي؟)
3- اللحمة. (بتحبها بالدود ولا الدود بره؟)
4- المرأة القاضية. (دي جمعية جديدة غير جمعية المرأة المتوحشة؟)
5- ثروة مبارك. (كام بالصلاة على النبي؟)
..
أهي القضايا اللي فاتت دي عينة بتوضح المرحلة اللي إحنا عايشين فيها..
..
إحنا بعاد يا معلم بُعد المشرق عن المغرب بالنسبة للإنجليز وعن أي مجتمع تاني ديموقراطي محترم..
..
الناس دي تجاوزت الكلام عن القضايا دي من عشرات السنين خلاص..
..
يعني أصول ما نحلمش بحكاية المناظرات والمرحلة المتفوقة دي..
..
يا راجل، ده أحنا في "بير السلم" بالنسبة للمرحلة دي أصلاً !!
..
ادعي بس إننا نطلع من بير السلم، ونوصل للدور الأول ميزانين..
..
بس وإنت طالع خلي بالك من السلمة المكسورة..
..
"طرااااخ..!"
..
مش قولت لك خلي بالك؟
ليست هناك تعليقات:
إرسال تعليق