البلد مقسومة نصين؟
..
دم هنا .. ودم هناك؟
..
قسم كبير من اللي أيدوك انقلبوا عليك؟
..
حاسس إن العملية بتفك منك؟ وبعد ما كان إعلام العالم بيحكي ويتحاكى عن ميلاد زعيم جديد في المنطقة بعد "إنجازك" في "هدنة غزة".. ودلوقتي.. بيتكلموا عن رئيس مرتبك ومقامر بعد قيامه بخطوة غير مدروسة دون استشارة جيدة.. قصدهم على الإعلان الدستوري الأخير يعني؟
..
ولا يهمك يا ريس.. ما تقلقش.. وما ضاقت إلا وفرجت.. والفرج بعون الله في الكلمتين الجايين..
..
أولا كده الإعلان الدستوري الجديد ده ح نلغيه كله في بعضه.. عشان اللي شار عليك بيه منه لله بقى !
..
- يعني النائب العام القديم يرجع؟
..
لا يا ريس إنت تقعد مع مجلس القضاء الأعلى وتتفقوا على شخصية تانية غير الحالي.. وبكده يبقى حفظنا ماء وجه الجميع..
..
نخش بقى في المهم..
..
في الأول عاوز سيادتك تاخد بالك من حاجة للأسف ما حدش من مستشاريك فطّنك عليها.. أو أصلاً هما ما يفطنوش عليها..
..
لو شكلت التأسيسية من جديد إن شا الله 50 مرة .. مش ح تطلع منها بدستور وح نفضل في الدوامة دي .. عارف ليه؟
..
عشان الجماعة اللي فيها شغالين على دستور قبل انتخابات برلمانية مفروض ح تتعمل بعد الدستور على طول..
..
- طب وفيها إيه؟
..
لا، دي فيها كتير يا رياسة.. لأن حتى لو كان أعضاء التأسيسية ملايكة فمش ح يشتغلوا عشان مصر.. للأسف ! ح يشتغلوا عشان أحزابهم وتياراتهم السياسية.. السلفي مش ح يقدر يتنازل عن مواد الشريعة عشان الناخب بتاعه.. والمدني مش يتنازل عن حقوق المرأة والأقليات عشان الناخب بتاعه..
..
وبصراحة يا ريس.. هم كده معذورين.. ما ينفعش واحد يعمل دستور وهو تحت ضغط كده.. الطبخة ح تشيط أو ممكن تطلع صايصة!
..
- طب يبقى إيه الحل؟
..
إنك تشيل من عليهم الضغط ده يا ريس عشان يعرفوا يمخمخوا ويهروا صح في الدستور.. ده مش لعبة!
..
- طب والانتخابات؟ ح نفضل كده من غير برلمان؟
..
ههه أين البرلمان؟ (على رأي واحد صاحبك يا ريس)
..
بص يا كبير.. ح نلعب لعبة بنت حرام..
..
سيادتك ح تعمل فوراً وبسرعة مجلس تشريعي مؤقت.. وبالتعيين .. يعني مش منتخب ولا بطيخ.. والناس ح تنبسط وما حدش ح يعترض كمان..!
..
- إزاي بقى؟
..
أنا سعيد إنك سألت السؤال ده. (على رأي واحد تاني صاحبك بس مش قوي يا ريس)
..
150 عضو تنقيهم بأستذة وحرفنة.. يعني تفكر في المعارضين قبل المؤيدين.. تجيب ناس من المحكمة الدستورية ومجلس الدولة وناس من مجلس نقابة المحامين وناس من منظمات مجتمع مدني.. وبعد ما تخلص التشكيلة دي.. تكمل المجلس التشريعي ده بالرجالة بتوعك.. بس تنقي يا معلمي.. يعني ما تحطش بقى الوجوه اللي عاملة مشاكل مع ناس تانية.
..
وما تخافش يا رياسة.. التشكيلة النهائية ح تكون أغلبيتها من رجالتك بنسبة أكتر من 50% ولا حاجة فتضمن ولاء المجلس..
..
- طب إيه فايدة اللفة دي؟
..
سياسة الاحتواء يا ريس.. أو بالبلدي الإيد اللي ما تقدرش على قطعها.. بوسها.. ! ناس عاملة لك قلق في الإعلام وفي الشارع السياسي إديهم البريستيج بتاعهم وخدهم تحت باطك.. واشركهم في المسؤولية وما تشيلش الشيلة لوحدك..!
..
حلو كده؟ نخش بقى في التقيل..
..
المجلس التشريعي ده مش ح يدوم للأبد.. ده مؤقت لحين انتخاب برلمان جديد..
..
- الله؟ طب ح نعمل انتخابات برلمانية جديدة إزاي من غير قانون ليها ولا مواد دستورية تعرفنا إيه هي صلاحيات البرلمان وكده؟
..
ما شاء الله عليك يا ريس !.. نبيه وصاحي للكلام..أقول لحضرتك..
..
المجلس التشريعي ده أول حاجة يشتغل عليها ولازم يخلصها في أول أسبوع.. اختيار لجنة تأسيسية جديدة لصياغة الدستور الدائم ونفكنا بقى من العوق بتاع قبل كده..
..
اللجنة التأسيسية الجديدة ح يكون عدد أفرادها ما يزيدوش عن 30 واحد .. أغلبها فقهاء دستوريين وقانونيين مع كام أستاذ في الضبط اللغوي..
..
بس يا ريس وإنت بتنقي أعضاء لجنة التلاتين دول تراعي.. المهنية فقط.. ولا اعتبار للميول السياسية هنا.. ده دستور يا كبير.. يعني عاوزين صنايعية وأسطوات مش عيال عدم المؤاخذة !
..
- طب التمثيل المجتمعي لكل طوائف الشعب؟
..
فكك يا ريس.. التمثيل المجتمعي ده يبقى على هيئة لجان استماع فقط.. كل الطوائف والنقابات والشعب يعرضوا اقتراحاتهم على لجنة التلاتين ويسمعوا منهم.
..
كده بقى معانا إيه لحد دلوقتي؟ مجلس تشريعي مؤقت ولجنة تلاتين لصياغة الدستور.. إيه الخطوة اللي بعديها؟
..
لجنة التلاتين في ظرف أسبوع تاني تطلع إعلان دستوري مؤقت يتضمن شكل السلطات الثلاث اللي في الدولة (تنفيذية وتشريعية وقضاء) ويوضح مهامهم وصلاحياتهم.. وكمان قوانين انتخاب البرلمان والرئاسة والمحليات ويتضمن المواد البديهية المتفق عليها ولا يتضمن المواد الخلافية.
..
خلص الإعلان الدستوري المؤقت؟ قشطة ! تروح بقى الصيغة النهائية منه للمجلس التشريعي المؤقت عشان يقره..
..
- وليه بقى الخطوة دي؟
..
عشان تحصّن الإعلان الدستوري يا رياسة.. تحصّنه بالحيلة وبالطريقة..
..
لما يكون عندك مجلس تشريعي ممثل فيه المحكمة الدستورية وشيوخ القضاء اللي كبّرت بيهم .. يبقى مين اللي ح يطعن عليه إذا كان المحكمة الدستورية مشتركة في إقراره؟
..
تمام لحد كده؟ نتوكل على الله ونعمل انتخابات برلمانية بقى.. !
..
وبكده بقى معانا تلات حاجات .. برلمان منتخب.. إعلان دستوري مؤقت.. لجنة التلاتين ..
..
- الله؟ طيب كده لجنة التلاتين ما بقاش ليها لزمة؟
..
لا يا رياسة.. إنت نسيت إننا عاوزين دستور دائم بقى؟ لجنة التلاتين دي تشتغل على الدستور الدائم بس معاها مدة أطول بقى وبراحتهم.. مافيش ضغط عليهم.. ومش ح يبصوا على انتخابات ولا أي حاجة وده ح يديك منتج نهائي أفضل بالتأكيد !
..
أنا خلصت يا ريس بس كلمة أخيرة لو تكرمت..
..
اعتبر اللي فات خريطة طريق أو حتى هدنة زي اللي اشتركت في إنجازها لغزة..
..
بس دي ح تبقى هدنة لمصر وخريطة طريق لمستقبلها !
