كابتن مدحت شلبي: أعزائي المشاهدين.. حلقة جديدة من برنامجكم.. مساء الأنوار
لا حديث الآن إلا على مباراة مصر والجزائر وما تلا هذه المباراة من تجاوزات شرذمة مجرمة من الجمهور الجزائري في حق الكرامة المصرية..!
والحقيقة إن قناة مودرن سبورت برئاسة د. وليد دعبس، ح تبدأ في حملة "عايزين حقنا"، ح نعرض فيها كل اقتراحتكم ومداخلاتكم عشان تقول لنا إزاي نجيب حقنا الي ضاع في السودان.
الجماعة بيقولوا لي في الإير بيث إن د. وليد دعبس العضو المنتدب لقناة مودرن سبورت معانا في مداخلة تليفونية..
- مساء الأنوار يا دكتور وليد.
د. وليد: مساء الأنوار يا كابتن مدحت، أنا عايز بس أقول للشعب المصري إننا ح نجيب حقنا يعني ح نجيب حقنا..!
كابتن مدحت شلبي: طبعاً يا د وليد، لكن أنا حابب الأول أعرف تفسيرك ليه الجمهور الجزائري ده قدر يتجرأ على المصريين؟
د. وليد: علم مصر يا كابتن مدحت، علم مصر هو السبب..!
كابتن مدحت: طيب، ممكن سيادتك توضح للمشاهدين أكتر يا دكتور وليد؟
د. وليد: يا كابتن مدحت، بذمتك عاجبك شكل النسر اللي على علم مصر؟
كابتن مدحت: طب يا جماعة ممكن تعرضوا لنا علم مصر على الشاشة عشان نفهم وجهة نظر الدكتور وليد كويس؟
د. وليد: يا كابتن مدحت، النسر كاشش زي الكتكوت المبلول وشكله خيبان خالص، طب ما طبعاً لازم علم مصر يتهان وما حدش يحترمه.
كابتن مدحت: فعلاً يا د. وليد، دي ملاحظة ذكية منك.. لكن أنا حابب آخد رأي ناقدنا الرياضي الكبير الأستاذ محمود معروف اللي مشرفنا النهارده في برنامج مساء الأنوار.
الأستاذ محمود معروف: د. وليد دعبس طبعاً راجل لمّاح وأنا بأحييه فعلاً على ملاحظته دي.
كابتن مدحت: الاتصال اتقطع؟ طيب ع العموم أحب أشكر الدكتور وليد دعبس على اتصاله ومداخلته الرائعة..! لكن أنا عايز أسألك يا أستاذ محمود، تقترح إيه بالنسبة للنسر اللي على علم مصر؟
الأستاذ محمود معروف: إنت تعرف يا كابتن مدحت، إن النسر اللي على العلم ده ما كانش شكله كده في الأول؟
كابتن مدحت شلبي: الحقيقة أنا مش فاكر، طاب ما تقول لنا يا أستاذ محمود كان شكله عامل إزاي؟
الأستاذ محمود معروف: النسر ده كان فارد جناحاته وكان شكله نسر محترم كده له هيبة كبيرة. ما كانش حد يشوفه إلا ويكن له كل احترام.
كابتن مدحت شلبي: طب هما غيروه ليه بس؟ ولأ وجابوا لنا نسر خيبان كده على رأي الدكتور وليد اللي بأتفق معاه مليوووون المية.
الأستاذ محمود معروف: أنا عارف هما غيروه ليه بس؟!
كابتن مدحت شلبي: أعزائي المشاهدين، طبعاً أنا حابب أسمع مداخلاتكم وآرائكم على كلام الدكتور وليد والأستاذ محمود ولكن .. بعد الفااااصل..!
..
..
..
كابتن مدحت: مساء الأنوار على مشاهدينا الكرام ودلوقتي أنا ح أفتح التليفونات، معانا الكابتن (أحمد شوبير) وهو حابب يعمل مداخلة.
كابتن أحمد شوبير: مساء الأنوار يا كابتن مدحت، بصراحة هي المداخلة مش ليا لكن لواحد قاعد جنبي وأعتقد أن المشاهدين يهمهم يسمعوا رأيه برضه.
كابتن مدحت شلبي: أهلاًَ بيك يا كابتن شوبير، وبضيفك الكريم اللي قاعد جنبك.
صوت مجهول: إزيك يا كابتن مدحت؟
كابتن مدحت (منتفضاً): هو أنت؟!! يا أخي، إحنا كنا استريحنا منك..!!
الأستاذ محمود معروف (متدخلاً بعصبية): إيه يا كابتن شوبير؟ إنت عامل لنا كمين ولا إيه؟ خلاص؟ بقيت إنت وعلاء صادق حبايب اليومين دول؟!!
د. علاء صادق: الكابتن مدحت شلبي والأستاذ محمود معروف، أرجو أن تتحملاني لمدة دقيقة واحدة ولعل الدكتور وليد دعبس يسمعنا الآن كما يسمعنا ملايين المشاهدين.
كابتن مدحت شلبي (في منتهى الإحراج والغيظ): طبعاً إحنا هنا ما نقدرش نحجر على رأي أي مشاهد لمودرن سبورت.
د. علاء صادق: عندما تركت مودرن سبورت وأعلنت استقالتي على الهواء مباشرة كانت لي أسبابي وهي أني لا يمكنني الجلوس بجوار الجهلاء والحقيقة أنه الآن قد تأكد صدق حديثي.
الأستاذ محمود معروف (منفعلاً): إحنا مش ناقصين مهاترات على الهواء يا د. (علاء)، ولو سمحت يا كابتن مدحت اقطع معاه الاتصال، لأن ده واحد من حزب الحاقدين.
كابتن مدحت شلبي (وغيظه يزداد): الدكتور (علاء صادق) لو حابب تتكلم في موضوع النهارده، يبقى تتفضل تتكلم وإلا أنا ح أضطر آسفاً اقطع معاك الاتصال.
د. علاء صادق: حنانيكما يا كابتن مدحت ويا أستاذ معروف، لقد طلبتُ المداخلة لأجل الموضوع الذي تتحدثان فيه وقد راعني المعلومات المغلوطة التي تذيعانها على الهواء أمام الملايين من المشاهدين.
وحتى لا أطيل عليكما أو على السادة المشاهدين، أحب أن أوضّح أن النسر الحالي الموجود على علم مصر وضع في عام 1984 والحقيقة أن ما زعمه الأستاذ محمود معروف ولم يعترض الكابتن مدحت شلبي عليه بخصوص ما كان موجوداً قبل النسر الحالي وادعيا كذباً أنه كان نسراً. هو لم يكن كذلك وإنما كان صقراً..!
كابتن مدحت شلبي: ...........
الأستاذ محمود معروف: ............
د. علاء صادق: أخيراً أحب أعتذر للسادة المشاهدين على محدودية ثقافة بعض الإعلاميين وعدم تمكنهم من التمييز بين النسر والصقر.
لا هو فتك بصراحة
ردحذفو بمناسبة النسر و الحيوان القومي احب اهدي قراء المدونة وانت اولهم يا أوس المقال الرائع ده
http://www.shorouknews.com/Columns/Column.aspx?id=314548
الصديق / إنت مش عارفني؟
ردحذف..
شكراً على مرورك الكريم.
انا اكون قريبة الدكتور وليد ومن عائلته ايضا عائلة الدعبس
ردحذفوشكرا