درس تاريخ: وقد شهد يوم التاسع من مايو توحد المصريين خلف فريق الأهلي ضد فريق الاتحاد الليبي وتجسدت مشاعر الوحدة الوطنية في أعلى صورها حين رأينا علم الأهلي ملتصقاً بعلم الزمالك.
واحد محامي رافع قضية عشان يدخلوا البنات الجيش، أيوه كده يا ودييييييع، المحامي ده لو كسب القضية، أنا ح أروح أتطوع في الجيش.
يخرب عقلك يا برادعي، إنت كمان كنت لعيب إسكواش؟ طب قشطة،، زمان أيام الفتوات كان بيعملوا مبارزة بالنبابيت بين أي اتنين فتوات بيتخانقوا على منطقة، لكن إحنا دلوقتي متحضرين بقى، إنت تتحدى مبارك في مباراة إسكواش واللي يكسب يذوق عسل مصر.
تسيبي ليفني زعيمة المعارضة الإسرائيلية تلتقي بجورج ميتشل المبعوث الأمريكي لمنطقة الشرق الأوسط، واخدين بالكم؟ ما حدش طلع في إسرائيل بقى يقول الحق يا جدع، ليفني عميلة للأمريكان.
علي الطلاق بالتلاتة، إحنا بنحبك يا ريس،،،،، ده كان هتاف أحد الحاضرين في خطاب مبارك في عيد العمال.
هي صوابع الرجلين ما لهاش أسامي زي صوابع الإيدين؟
إحنا دايماً بنحب نجلد ذاتنا، ما نحاولش نبص لمميزاتنا، شاغلين دماغنا بعيوبنا وكأننا غلطة تاريخية بين الأمم،،،،،،،،،،،،،، ثانية واحدة، ما أهو ده برضه جلد للذات..!!
هو كابتن مساء الأنوار ما عندهوش زعافة تشيل العِنكبوت اللي معشش تحت مكتبه ده؟
عفواً أسامة أنور عكاشة: ليالي مرتضى وشوبير أحلى من ليالي الحلمية.
الأمل ده والله تعب معانا، كتير قوي مننا متشبثين بيه، أنا خايف يروح يعمل لنا محضر تحرش.
ليست هناك تعليقات:
إرسال تعليق