هل يتسبب الحضري في أزمة سياسية بالسد العالي؟

جماعة صحفيين كانوا في زيارة للسد العالي..
قوم بقى إيه؟
ما يلاقوش عليه صورة الرئيس الراحل جمال عبد الناصر..!
يا سنة سوخة يا ولاد!
الراجل اللي اتبنى في عهده السد العالي، صورته راحت فين يا ولاد السحالي؟
لأ، والأكادة يلاقوا صورة الرئيس الراحل أنور السادات موجودة على صرح رمز الصداقة اللي هناك..!
..
على طول واحد فكيك طلع بنظرية وقال:
"آه، ما أهي دي عادة ملوك الفراعنة دايماً، يسطوا على إنجازات غيرهم"
..
رد عليه واحد تاني بس باين عليه إنه بيفهم شوية:
"يا جماعة دي إشاعة طلعت على ملوك الفراعنة والحقيقة مش كده"
..
واحد تالت اتدخل في الموضوع:
"بصوا يا إخوانا، الحكاية مش حكاية سطو على إنجازات ولا حاجة.. بكل بساطة تلاقوا واحد موظف مسؤول كان هنا وحب ينافق الرئيس السادات، فالسادات ما لهوش ذنب"
..
يهز أكبرهم سناً رأسها موافقاً وهو يقول:
"طبعاً هو النفاق ده اللي جايبنا ورا، حتى بصوا حواليكوا.. صور الرئيس مبارك مغرقة المكان"

يتلفتوا حولهم بالفعل، يليها مقطوعة موسيقية من مصمصة الشفاه كعادة المصريين الذين لا حول لهم ولا قوة..
..
هل انتهت الحدوتة؟
لأ، لسه شوية!
..
إذا كان الناس دي ح تتخانق على صورة، فأنا عندي الحل..

..

ومن غير ما نزعل حد..

..

إحنا نحط صورة الكابتن عصام الحضري حارس المنتخب المصري..

..
وأهو يبقى اسم على مسمى..
..
مش الكابتن عصام يبقى السد العالي بتاع المنتخب برضه؟
..
وعلى الله حد يعترض..!
..
سامعني يا عدلي يا قيعي؟
..
صورة الحضري ح تتحط على السد العالي غصب عن التخين في مصر!