قناة دماغوس.. مشروع القرن..!

قال لك نعمل ممر التنمية.. ده  الدكتور فاروق الباز.. حاجة كده زي نيل تاني ح يبقى موازي للنيل الأولاني.. ده هو اللي بيقول !

ماشي يا عم..

قام طلع الباشمهندس ممدوح حمزة وقال لك مشروع النيل 2 ده مشروع فاشل، وقام مطلع فيه القطط الفطسانة مش عارف ليه..

وراح راقع المشروع بتاعه..

دلتا تانية موازية للدلتا الأولانية.. في الصحرا بقى يا مان..

الله؟

هو حكاية التوازي عندكم يا إخوانا؟ نيل موازي ودلتا موازية؟ هيهيهي، فكرتوني بالبرلمان الموازي يا بعدا..

طيب، بما إنها بقت موازيات كده.. فـ"خليهم يتسلوا" ونعمل إحنا مشروع أنقح من مشاريعهم..

مشروع "قناة دماغوس الموازية لقناة السويس اللي ح نردمها"

ويبدأ مشروع ""قناة دماغوس الموازية لقناة السويس اللي ح نردمها" - كما هو مبين في المخطط - من مدينة رفح المطلة على البحر المتوسط والواقعة على حدود مصر وقطاع غزة الفلسطيني..

لتنتهي القناة عند مدينة طابا المطلة على رأس خليج العقبة على الحدود المصرية الإسرائيلية..

قناة جديدة لانج، ونفكنا بقى من قناة السويس اللي عملنا لنا قلق في سينا دي..

..

نردم قناة السويس دي يا معلم.. وسينا "ترجع تاني لينا" بقى بجد..

..

وأهو إحنا ح نعمل قناة تانية بقى.. "قناة دماغوس الموازية لقناة السويس اللي ح نردمها"

..

ونحاوط على بلدنا من الأعادي اللي جنبنا دول.. عشان مش كل شوية نائب في الكنيست ولا وزير إسرائيلي يطلع من عندهم يقول لك: ح ناخد سيناء ح ناخد سيناء

..

لا يا عم، إحنا نعمل قناة تصعب عليهم الحكاية..

..

بس بأقول لك إيه؟

لو خلصنا المشروع ده "قناة دماغوس الموازية لقناة السويس اللي ح نردمها"، وجت إسرائيل ناطة من الناحية التانية وشغلت "قناة دماغوس الموازية لقناة السويس اللي ح نردمها" لحسابها..

ما حدش يدعي عليا والنبي..!