الباشا ملتحي..!

هو مشهد شهير وبيتكرر كتير في الأفلام..

مشهد التحقيق مع المتهمين..
وده اللي الظابط بيحاول فيه يبوظ أعصاب المتهم عشان يعترف..
..
بيعمل إيه بقى؟
..
1- الظابط يقلع الساعة بتاعته ويحطها على المكتب.
2- وبعدين يشمر أكمام القميص.
..
بس يا عم.. وتلاقي المتهم هرّ على طول.. (اوعى تقولي إنت مش فاهم دلالات الخطوتين دول إيه)
..
لكن أكيد الأمور اختلفت بعد الثورة..
..
يعني بذمتك، في واحد اليومين دول ح تتهز له شعرة من قلعة ساعة ولا تشميرة كم؟
..
طب إيه؟
..
السينما تبوظ فنياً؟ وتخسر أحد أهم الأكليشيهات اللي (بتجيب مع الناس)..
..
مين قال؟ إنت ما سمعتش عن الظباط اللي عاوزين يطلقوا لحيتهم؟
..
ها.. إيه رأيك؟
..
المشهد الجديد ح يبقى كده..
..
1- الظابط يقلع الساعة بتاعته ويحطها على المكتب.
2- وبعدين يشمر أكمام القميص.
..
3- وبعدين يبص للمتهم نظرة خاصة وهو بيلعب بصوابعه في لحيته..
..
و.. خلاص!

الصورة من موقع ماشي دوت كوم